منوعات

خناقة حمو بيكا وعمر كمال لايف بسبب فستان فرح وفلوس اليوتيوب.. «صحاب مزيفة»

حالة من الجدل انتشرت علي صفحات السوشيال ميديا بعد هجوم المطرب الشعبي حمو بيكا علي عمر كمال بسبب عدة خلافات من أبرزها الحصول على أرباح اليوتيوب والغناء لأحد متاجر فساتين الأفراح .

هاجم مغني المهرجانات حمو بيكا، عبر صفحته الرسمية بموقع التواصل الاجتماعي، «فيسبوك»، زميله الفنان الشعبي عمر كمال، بعد أن نشر صورة وعليها علامة «X».

وقال «بيكا» فى منشوره: «ياريت محدش يكلمني في شغل على الشخصية دي عشان أنا كنت بحبها والشخصية دي بتتهرب من شغلي اللي خلاني اتفق عليه، والإثبات بعد الصورة دي هنزل فيديو، وهو عامل بيحبني وهو بيكرهني، مع السلامة يا صحاب مزيفة».

رد المطرب عمر كمال على هجوم مغني المهرجانات حمو بيكا عليه قائلا: «أنا فوجئت إن حمو بيكا منزل صورتي كأني واحد إسرائيلي أو واحد عدو وكاتب الكلام اللي انتوا شوفتوه ده كله».

وأضاف «كمال»، خلال بث مباشر عبر صفحته الرسمية على موقع التواصل الاجتماعي “فيسبوك”: “بص يا حمو أنا محترم وصبرت كتير على إهانات الناس وقلة أدب الناس وأنت طالع تقول على عمر كمال وحسن العجوز قصيرين، أنا ممكن اطلع أقول عليك بكرش لكن ده كلام قلة أدب ماليش فيه بس قلة الأدب وقلة الذوق اللي بتستخدمها دي أنا ماليش فيها ومش منطقي ولا مبدأي”.

وأوضح «كمال»، «أول تراك انتي معلمة أخدته من حمو بيكا وشمس المجرة إنتاجي وإلحاني أنا سايبهولك على قناتك وفلوس وبنتخان ومساء النقص وفايقة ورايقة وكل التراكات سايبهالك على قناتك وأنت بتاخد فلوسها وبتكسب بيها ولكن من دلوقتي هقفل كل التراكات  التي شاركت فيها على قناتك».

وتابع، «حمو بيكا كان بايت عندي في البيت اللي كلنا فيه عيش وملح ورايحين مشوار وقولت له تعالى معايا عند الحلاق نعمل شعري ونروح مشوار ولقيته جايب واحد بيتفق معاه على شغل سنتر بتاع فساتين.. أنا مالي أعمل مهرجان لبوتيك ليه ولفستان فرح ليه وأنا عايز اشيل نفسي من الأسماء».

واستطرد حديثه، «أنا بتصل بيك أقدرك وأقولك هتاخد كام لكن انت مبتعملش كدا .. فلوسك مش مناسباني ومش عايزها وشايف الأجر ده قليل عليا بتتفق لي ليه، أنا طول عمري بديك تراكاتي .. وكنت بدافع عنك في النقابة وأنا يا حمو في عز ما كانت بنت الجيران قالبة الدنيا جت لك حد عندك في عز ما كان صحابك يهربوا منك وكنت بتوقف من النقابة وبقف جنبك».

وتساءل عمر كمال: «فين فلوسي فين فلوس فستان الفرح وفين فلوس المهرجان .. الشغل له أصول هو أنا اقدر أوديك فرح بدون عربون .. أنت دخلت بيتي ونمت في بيتي وأكلت في بيتي عيش وملح وعيب تكتب كده قدام الناس».

عيب يابيكا

ووجه عمر كمال رسالة لحمو بيكا قائلًا: «يا بيكا عيب يا بيكا وعيب تقول أني صحبة مزيفة أنا عمري ما كسبت وراك أبيض ولا أسود وأنا سيبت لك 12 تراك على القناة كلت من وراها الشهد .. الشغل له أصوله وأنا لو بجمع في فلوس كنت سيبت لك التراكات دي كلها على قنواتك وأنا أكتر واحد بيتكلم عنك كويس في النقابة وأنا بغني معاك ومش عايز أحسسك أنك لوحدك ومنبوذ وأنك مش فنان».

وأنهى حديثه قائلا، «عيب تكتب عليا كده وأكلنا مع بعض عيش وملح وبلاش تعمل كده مع ناس بيحبوك والشغل اللي قال عليه ولا أخدت منه أبيض ولا أسود ولا عرابين والمفروض تاخد رأيي مش تحطني على أرض الواقع .. ولو أنت سايب لي تراك أنا سايب لك 15 تراك على قناتك وعمري ما سألتك في أبيض ولا أسود».

عمر كمال انانى

وظهر مغنى المهرجانات حمو بيكا، فى فيديو له عبر حسابه على موقع «انستجرام» قائلا، «لما تطلع تتكلم، تحدد النجاح من اللى عمله معاك، انت مبنتش نفسك بنفسك، وأنت ظاهر أمام الشعب المصرى إنك أنانى مبتحبش غير نفسك، وحابب إن انت تصنع النجومية لنفسك وبس، فكك من اللى انت بتعمله وخليك محترم وكويس».

ووجه بيكا حديثه لعمر كمال قائلا: «أخونا عمر كمال لما سمع اللى اتقال قال إحنا نجحنا، لكن اللى أنا شايفه إنك كلك على بعضك غلط، حياتك غلط، دنيتك كلها ماشية غلط فى غلط، عايز تحقق نجاحك انت بس، فرجنى يا فهلوى يا حلو واعمل كام تراك لوحدك».

 

زر الذهاب إلى الأعلى